TURA: Garo Hills-o konta 7-oni konta 10-mang ong·pile load shedding ba bijoliko kimitengani a·sel manderang neng·nikanirangko chagrongna nangtokengani gimin bijoli kimitani somoio konta 2-oni konta 4-mangona komiatskachina gita Federation of Khasi Jaintia Garo People (FKJGP) Garo Hills Zone, a·dokni Power Minister AT Mondal-ko mol·molataha.
FKJGP Garo Hills Zone-ni president Pritam Arengh-ni parakatani gitade, ia sal somoirango Garo Hills gimikon nangana batpile ding·aniko chakna gita nangtokengon, bijoliko konta 7-oni konta 10-mang ong·pile kimitengania manderangna dongtogijaniko on·an baksana manderangni janggi tanganio nangchakeanikoba ra·baani gita ong·engahachim.
“India a·songni dingtang dingtang power agency-rangna grorang donge Meghalaya sorkari tangka paisani gita neng·nikanirangko chagrongna nangenga ine chinga ma·sienga aro a·doko songdongenggipa manderangoniko da·o SGST-koba ra·skaengahani gimin Meghalaya a·dokni obosta bilsi 10-na skangna bate da·o nambatengaha ineba chinga ma·siskaenga. A·dokni manderang da·o ma·mong sorkarina CGST-ko gaman baksana a·dok sorkarinaba SGST-ko gamna nangengahani gimin bijoli gita dakgipa nanganirangko name man·na ka·dongpaengachim,” ine Marak parakataha.
Indake ong·engon, a·doko bijoli kimitaniko nipiltaienba, man·a dipet bijoli kimitaniko kontagnioni kontabriona komiatchina gita FKJGP Garo Hills Zone, a·dok sorkariko didiataha.
