SHILLONG: Roster system-ko ra·gatani bidingo dingtang dingtang dolrangni gisepo jera ra·grikanirangko nikna man·engon, 1972 bilsini State Reservation Policy aro roster system-ni bidingo sorkari, pilak dolrang baksa agangrikchengesa nambata ja·kuko de·anggen ine a·dokni Deputy Chief Minister Sniawbhalang Dhar, ku·rachakaniko on·ataha.
“Iano chinga sanaba chaka chakjani katta dongja aro iani bidingo sorkari namesa ja·kuko de·gen ine anga na·simangna ku·rachakaniko on·enga,” ine Dhar, kobor ra·timgiparangna aganaha.
Ua saksa a·dok gimikni Deputy Chief Minister-na ong·engani gimin Jaintia Hills a·jani dilgipa gitade iani bidingo aganna nangani dongjawa ineba Dhar parakataha.
“Anga a·dok gimikni deputy chief minister-an ong·a aro a·doko songdongenggipa mande sakantinan simsakna nangao ga·aka,” ine ua aganaha.
Iani bidingo chanchirimna gita a·dokni Chief Minister Conrad Sangma, MDA-ni tom·aniko ong·atanggen ineba Deputy Chief Minister parakataha.
“Pilak dolrangni tom·aniko ong·atanide nangchongmota ine anga bebera·a. Iani bidingo dingtang dingtang dolrangni nangnikanirangkoba chinga knae ra·na nanga,” ine Dhar aganaha.
Roster system-ni bidingo ja·ku de·ani ru·utgenchimode dingtang dingtang jatrangni gisepo meligrikgijanirang ong·katjawama ine sing·anina aganchakaniko on·angengon, pilakni ra·chakna man·gni ong·na gitasa sorkari ja·kuko de·gen ine Deputy Chief Minister parakataha.
Indake ong·engon, roster system aro job reservation policy-ko Meghalaya a·dokni Khasi, Garo aro Jaintia jatrangna apsan ong·e sualanikosa BJP nangnikenga ine BJP-ni state president Ernest Mawrie parakataha.
Ian manderango nangchakegipa kam ong·ani gimin manderangoniko sing·sandie ra·na gita dingtangmancha BJP, advisory committee-ko songaha ineba Mawrie parakataha.
Mawrie-ni parakatani gitade, ia advisory committee-ko gitcham MLA HM Shangpliang, convenor ong·e dilenga aro ia committee-o BJP-ni MLA sakgni, chong·motan AL Hek aro Sanbor Shullai baksana state president Ernest Mawrie-koba membor dakataha.
Ia committee-ni report-ko sal 15-ni gisepon on·gen aro report-ko on·ahaon, BJP-ni ku·pattianirang baksa sorkariona ra·anggen ine Mawrie parakataha.
