SHILLONG: Roster system-ko mikkangchinasa nie tarichina gita People’s Democratic Front (PDF)-ba a·dok sorkariko didiataha.
Iani bidingo kobor ra·timgipa manderang baksa agangrikengon, roster system-ara namen chanchibewalna nanggipa aro simsakbena nanggipa kam ong·a ine PDF-ni president Gavin Miguel Mylliem parakataha.
“Da·o kattade roster system-ko batanggimin somoiko nie tarigenma ma mikkangchina nie tarigen. Iani bidingo Legislature aro Executive-nasa Meghalaya High Court pakwate on·manaha ineba an·ching ma·sienga aro ian a·dokni namgninan ong·enga,” ine Sohra-ni PDF MLA aganaha.
Roster system-ko 1972 bilsioni ra·gatnade man·jawaha ine janapatengon, a·doko gitcham itihasrangko see rakkianirang namen komia ine Mylliem parakataha.
“An·ching kakketko ma·sichenggijade skatang chanchichipe roster system-ko tarina man·jawa. Uni giminsa chinga PDF-ni gitade, roster system-ko batanggimin somoirangko nigija mikkangchini giminsa ra·gatchina nangnikenga,” ine PDF-ni president parakataha.
Iani bidingo a·dokni Chief Minister Conrad K Sangma an·tangan Cabinet-o aro MDA tom·anio chanchirimani ja·man pilak dolrang baksa tom·e chanchirimna gitaba ku·rachakmanaha ineba Mylliem parakataha.
Roster system-ni bidingo uamang, MDA-ni tom·anio aro pilak tom·anirangon an·tangtangni nangnikanirangko ku·rang on·gen ineba PDF-ni president parakataha.
Reservation policy-ko nipiltaichina gita mitam political dolrangni dabienggipani bidingo sing·on, reservation policy-ara namen simsakbena nanggipa kamsa ong·a aro iako pilakan namen ma·sia ine Mylliem parakataha.
“Ia obostani bidingo cholrangko ra·e politics kal·jachina gita anga political dolrangko didienga. Reservation policy-o nina nanggipa kamrang bang·en dongani gimin special committee-ko sorkari songgen ine chinga ka·dongenga. Ia committee, a·doko songdongenggipa dingtang dingtang jat aro manderangni nangnikanirangko ra·skana man·gen,” ine PDF president aganaha.