TURA: Tura-ni Police Parade Ground-o salgnina ong·atenggipa Tura Industrial Fair (TIF) 2.0-ko Bristibar salo, West Garo Hills a·jani Deputy Commissioner Jagdish Chelani, do·ga oe on·angaha.
Bilsio changprak ong·atrongenggipa ia Industrial Fair-ko District Commerce & Industries Centre (DCIC) ong·atenga aro ia industrial fair-ko, jolo bading chiwale cha·enggipa manderangko ra·dona aro uamangni bosturangko palna sim·na gita bilsiantian ong·atrongenga.
Ia Industrial Fair-ko a·bachengatanio, West Garo Hills a·jani Deputy Commissioner Jagdish Chelani, jinmana aganprakangengon, ia industrial fair-o bak ra·enggipa manderangna an·tangni bakrimpaaniko on·angenba, uamangni bosturangna aro kamrangna mittelpilaniko parakangaha.
District Commerce & Industries Centre-ni kamrangna mittelpilaniko parakangskaengon, jakni kamrangko ka·e cha·enggipa manderangko uamangan chubata gadangona ra·doangna man·gen ine Chelani, an·tangni ka·dongchakenganiko parakangaha.
Ia industrial fair-ko a·bachengatanio DCIC-ni joint director P Toi-ba jinmana aganprakangengon, ia exhibition-ko DCIC, bilsiantian ong·atenga aro ia exhibition-ko re·anggipa bilsi dipet Tura Industrial Fair ine mingskaaha ine parakataha.
Ia exhibition-o bak ra·gipa manderangoniko State Handicraft Award-na seokanggen ine janapatengon, seoka man·gipa manderang, New Delhi-ni IIFT aro dingtang dingtang a·dokrango ong·atenggipa exhibition-rango bakko ra·ena gita cholko man·gen ine Toi parakataha.
Ia Tura Industrial Fair-ko ong·atanio dingtang dingtang department-rang, jekai Animal Husbandry & Veterinary, Sericulture & Weaving, Horticulture, Tura Polytechnic (Food Processing) aro uandakgipa department-rangko man·chape Garo Hills-o jakni bosturangko bading chiwale cha·enggipa manderangba bakko ra·e ma·manti bosturangko mesokna aro palna gita donataha.
Ia Industrial Fair-ko April 21 tarikona kuliengani gimin gisiko nanggipa manderangde Tura Police Parade Ground-ona re·ange, bosturangko niena gita man·gen.
