NONGPOH: Bristibar salni 1:20 bajimango, Ri Bhoi a·jani Mawpun Kshaid-o donggipa Umroi Bypass-o oil tanker ba to salgipa gari bolsa, bikpile a·sel ong·ani ja·man chongipa gariko chagake wa·al kamchipaha.
Kobor on·timgiparangni u·iatani gitade, ia to salgipa gari, nanga bate ta·rake salenba Mawpun Kshaid songni ning·o donggipa Umroi Bypass-o bikpileke, chongipa gari bolgipino chagakeaha aro uandaken ja·mano ia gari bolgnion wa·al ching·gaoaha.
A·sel ong·a bakan Umiam Police Station-ni sipairang, wa·alko kimitna gita wa·al kimitgipa sipairang baksa ua biapona dariangaha indiba ua biapo chu·onga gita wa·al kimitgipa garirang dongjani a·sel wa·alko kimitningna man·jaha.
Koborko man·soani gitade, ia gari bolgniko wa·al kamchipanio darangba saknaanirangkode man·jaha.
