TURA: Dadenggre Civil Sub-Division-ko gital district songchina dabianiko Garo Students Union (GSU) Western Zone (North) Dadenggre a·bachengatpiltaienba, jolo songdongenggipa manderangni dabianiko chu·sokatchina a·dok sorkarina gisik ra·attaianiko on·angaha.
Dadenggre-ko district songchina dabiani bidingo sorkarina gisik ra·atpiltaianiko on·angengon, batanggimin bilsi 23-na Dadenggre-o songdongenggipa manderang, Dadenggre sub-division-ko district songchina dabiengachim indiba dingtang dingtang sorkarirang, ia dabianiko chu·sokatchipkujaenga ine GSU Western Zone (North) Dadenggre-ni president Tengsan M Marak parakataha.
“1999 bilsio Donkupar Roy-ni chief minister ong·engmiting somoion Dadenggre-ko district songchina dabichakatahachim. 2012 aro 2015 bilsini gisepo Dr Mukul Sangma-ni chief minister ong·engmiting somoirangoba changni chang iani bidingo a·dok sorkarina sedoatahachim. Uni ja·man 2018 bilsio gital sorkariko rikahani gimin chinga changni chang NPP sorkari aro a·dokni Chief Minister Conrad K Sangma-naba memorandum-rangko on·ahachim indiba da·alona kingkingan Dadenggre-ko district songchina dabianiko sorkari chu·sokatkujaenga,” ine Marak parakataha.
Ia dabianiko chu·sokgipa ong·atna gita Dadenggre Civil Sub-Division-ni ning·o donggipa dingtang dingtang constituency-rang, chong·motan Phulbari, Rajabala, Selsella, Tikrikilla, Raksamgre aro Dadenggre-ni MLA-rangko apsan nangrime kam ka·china gitaba GSU didiataha.
Dadenggre sub-division-ko gital district songgenchimode ian chadamberangna kamrangko nakatate on·na chol ong·genchim aro diltugipa songrango donggipa manderangni neng·nikanirangkoba chel·atna dakchakani ong·gnokchim ine janapatengon, ru·uta bilsirangoni manderangni dabiengggipa gital district-ko ta·raken be·en pil·atchina gita GSU Dadenggre, a·dok sorkariko didiataha.
Iani bidingo bakan GSU Dadenggre-ni dilgiparang, Dadenggre-ni gital MLA Rupa M Marak-ko gronge, district-na dabianiko bilakbatatgen ineba GSU Western Zone (North) Dadenggre-ni president parakataha.