SHILLONG: Meghalaya a·doko niam gri koela salruraaniko nirokna gita Central Armed Police Force (CAPF)-rangko rimbaengani gimin CAPF-rangko donatna gita biaprangko niengkua ine u·iataha.
Iani bidingo u·iataniko on·angengon, “Meghalaya a·doko niam gri koela salaniko nirokna gita CAPF-rangko on·atchina adita salrangna skangsan High Court, ma·mong sorkarina ge·etaniko on·manaha aro da·o ia CAPF-rangko donna gita mongsongbatgipa biaprangko niengkua,” ine Justice BP Katakey parakataha.
Supreme Court aro NGT-ni on·gimin ge·etani gita a·dok sorkari, niam gri koela bikotaniko champengna kam ka·engama ka·jaenga uko sandina gita Meghalaya High Court, Gauhati High Court-ni gitcham Judge BP Katakey-ko songahachim.
“High Court-ni bon·kamgipa ge·etanio Meghalaya Police-ni officer saksakoba High Court-chi seokchina ge·etmanahani gimin officer-ko sandianide angni daito ong·ja indiba officer-ko seokani bidingo anga police department baksa agangrikenga,” ine Katakey aganaha.
CAPF-rangko a·dokona watatahaon, badia badia biaprango nirokanirangko dakna nangenga, uarangko ma·mongoni re·bagipa police dolrangna mesoke on·na nanggen, uni giminsa da·o biaprangko sandisoenga indiba uamang dingtang chanchianirang donggenchim ong·ode iani bidingo ja·man chanchitaigen ineba Katakey parakataha.
Niam gri koela salruraanirangko nirok sandina gita ma·mongni sipai dolrangko donatanichi dingtanganiko ra·banaba gnang ine janapatengon, “Niam gri koela salruraaniko dontongatna gitasa ma·mongni sipai dolrangko donatna miksongengani gimin niam gri koela salruraaniko champengna man·genchimode niam gri koela bikotaniba an·tangtangan dontongainaba gnang,” ine Katakey parakataha.
