SHILLONG: Roster system-ni bidingo jera ra·grikanirang batroroangengon, Khasi ba Garo ine dakgrikaigija an·tangtangko Meghalaya-ni manderang ine pangnan gisik ra·china gita Gambegre constituency-ni MLA Saleng A Sangma didiataha.
Iani bidingo kobor ra·timgipa manderang baksa agangrikengon, Meghalaya a·doko reservation policy-ko ra·gatchenga intalan roster system-ba dongna nangachim ine Sukrobar salo, Saleng parakataha.
A·bachengonin ia reservation policy-ko kakket aro bebeo ja·rikjaha ineba ua aganaha.
Roster system aro reservation policy-ni gimin dakgrike dongaigenchimode mikkangchi jatgnini gisepo namjabatgipa obostarangko chagrongna nanggen ineba Congress MLA mikrakataniko on·angaha.
Iani bidingo toe janapatengon, adita salrangna skang judiciary-o kamna ra·engamitingo pilak manderangan dorgastorangko galtokaha aro iano Khasi ba Garo ong·gijagiparangkoba porikka sena on·aha ine Saleng parakatenba, ian Judiciary-ni roster system-ko a·bachengataha ine mesokani ong·aha ine talataniko on·angaha.
“An·ching jatsa jatgipinni kosako iandake dakgrike dongaia ong·ode an·chingo je donga ukoba mikkangchi gimaatsranggen,” ine ua aganaha.
Ia Roster system-ara Khasi aro Garorangko bak dakatna nangja ine janapatengon, “80 percent-de Meghalaya-ni manderangnasa ong·na nanga aro Khasi, ba Jaintia ba Garorangna ong·na nangja,” ine Gambegre MLA parakataha.
Meghalaya a·doko atchie dal·bagipa Khasi, Jaintia aro Garorangnade je dakgipa kamrangnaba cholko on·na nanga ineba Saleng aganaha.
Saleng-ni aganani gitade, gipin biaprangoni manderangsa a·doko kamrangko man·enga aro a·dokni manderang an·tangtangni gisepo dakgrike dongaigija iandakgiparangkosa champengna nangenga.
Pangnan an·tangtangko Meghalaya-ni mande inesa gisik ra·china gitaba ua didiataha.