SHILLONG: Shillong-Dawki road project-ni kamo ru·utani gimin, aro mijaomangmang a·a rurongdapanio sakgni manderang siani gimin aro gipinrangna matnangtokenga.
Indake ia project-ni gimin matnanganiko man·enganina talatengon, Deputy Chief Minister PWD (Roads) incharge Prestone Tynsong, ‘ia project-o maiba neng·nikarang ba badi ka·anirang dongode, manderang police-ona re·ange badi ka·na man·gen” ine aganaha.
NHIDCL-na ia project-ko matchotna daitoko on·aha. Sorkari an·tangni kam ka·na nanggniko ba daitoko namen matchotatjok, rama tarina a·akoba man·e on·aha aro a·ako pakwate on·aha. Minggipin mijaomangmang ong·anggipa a·selo jeon sakgni manderang siahachim, ua mamlao police baksa FIR-ko segataha. Aro police ia mamlako sandienga ine Tynsong aganaha.
Ia project-ko ta·raken matchotatna gita NHIDCL-na ge·etaniko on·aha. Indake sorkari mni Sukrobar salo NHIDCL-ni top official-rang baksa project-ni gimin agangrikangaha ineba talataha.
Iarangni gisepon NHIDCL, gipin biaponi company ong·ani gimin tender process- neng·nikarangko man·enga. ARSS Insrastructure Projects Ltd, Shillong-Dawki Road Project-ni tender-ko kror 210-o man·aha.
Minggipin Congress, Shillong-Dawki ramao a·sel ong·ao sakgni manderang siani mamlao NPP-ni dilenggipa MDA 2.0 sorkariko NHIDCL-na chaktatenga ine matnangaha.
NHIDCL-ni simsakgijani gimin ramao a·sel ong·ao sakgni manderang siaha aro saksku jokkom ong·tokaha.
