TURA: Garo Hills-o songdongenggipa manderangni nangnikengani gita Tura-ko Winter Capital ong·atna gitade skanggipa Tura-o gital Secretariat-ko nangchengenga ine Robibar salo, Tura-ni MDC aro BJP Meghalaya-ni state vice president Bernard N Marak parakataha.
“Garo Hills-ni manderang Tura-ko Winter Capital ong·atna nangnikenga. Tura-o Secretariat aro pilak office headquarter-rangko rikahaosa Tura-ko Winter Capital ong·atna nangnikani chu·sokgipa ong·gen,” ine Marak parakataha.
Marak-ni parakatani gitade, Garo Hills-o songdongenggipa manderangni nangnikaniko aro Tura-o Secretariat dongna nangenganiko election-na skangan BJP ma·siachim aro ia nangnikaniko chu·sokatna gitade, skanggipa Tura-o Secretariat aro dingtang dingtang department-ni headquarter office-rangko nangenga.
“Uni gimin Tura-o winter session-rangko ong·atna gita Tura-o gital Secretariat-ko rikchina BJP dabienga. Gital Secretariat-ko on·na gita ma·mong sorkari ku·rachakaha indiba proposal-ko a·dok sorkari, ma·mong sorkarina watatna nanggen. Tura-ko Winter Capital ong·atna nangnikaniko Chief Minister Conrad Sangma aro uni Cabinet chu·sokatna man·gen aro anga bebera·a iako ua uni Cabinet-o bakan a·bachengatgen,” ine Tura-ni MDC parakataha.
Meghalaya a·doko songdongenggipa Khasi, Garo aro Jaintia manderangna apsan bak rengsiko tikatna nangenga ine ma·sien BJP-ni election manifesto-o Tura-o secretariat-ko rikna proposal-ko donahachim ineba Marak parakataha.
“Meghalaya a·dokko man·na krengengmiting somoirango Garo Hills-ni manderangna ku·rachakaniko BJP ma·sia aro ia ku·rachakaniko chu·sokgipa ong·atna gita a·dok sorkari, Tura-ko Second Capital dake parakna kamko ka·na nangengaha,” ine Marak parakatenba, Tura-ko Winter Capital songchina ku·rang on·gipa dolrangko mittelpilataha.