NONGPOH: Re·anggipa Sonibar salo, Ri Bhoi a·jani Byrnihat jolo donggipa Umtrew chiringo hajalni hajal na·tokrangni sie balboe dongako manderang nikna man·aha.
Koborko on·ani gitade, ia chiringo iandake na·tokrangni siani skanggipa chang ong·jachim aro ian samba jolo donggipa karkanarangoni sambisirang chiringona jokbaesa na·tokrang sitokengakon ine manderang chanchichiptokenga.
Ia Umtrew chiringara, jolo songdongenggipa manderangna na·tokrangko rim·na aro dingtang dingtang kamrangna jakkaltogipa chiring ong·achim aro uandaken jolni manderang da·o ia chiringna aro chiringo donggipa jonturangna kenchakaniko paraktokaha.
Ia chiringo na·tokrangni siengani gimin ta·raken sandirokaniko dakchina gitaba jolni manderang, district administration-ko didiataha aro samba jolrango donggipa karkanarangkoba skatang moilarangko watjachina didiataha.
Ia chiringo na·tokrangni sianiko nikna man·engoba da·o dipet iani bidingo sandirokanirangko daka dongkujaengachim.