TURA: Tura-ko Winter/Second Capital songchina dabienggipani bidingo songni nokni dilgiparangna agan-talate on·na gita adita salrangna skang, A·chik Conscious Holistically Integrated Krima (ACHIK)-ni awareness program-ko Asanang-ni Wangala Building-o ong·atangaha.
Ia awareness program-ko ong·atanio damdok a·kingni Nokmarang aro ia a·kingrango songdongenggipa manderang bakko ra·angtokaha aro ia tom·anio ACHIK-ni general secretary Advocate Bernita R Marak, tom·anio bak ra·giparangna aganprakengon, 1972 bilsio a·bachengatgipa Job Reservation Policy aro High Court-ni rai on·gipa roster system-ni bidingo agan-talate on·angaha.
Ia program-ko ong·atanio, Tura-ko Winter Capital songchina dabienggipani gimin ACHIK-ni education secretary Macklowrence M Sangma agan-talate on·angskaengon, Tura-ko Winter ba Second Capital songchina dabianiara maming gital dabiani ong·ja maina Meghalaya a·dokko man·na skangan Tura-ko Winter ba Second Capital songna gita pagitchamrangni gisepo songgigrikani dongachim ine parakataha.
Tura-ko Winter Capital dake man·na da·o ACHIK dol, Garo Hills-ni dingtang dingtang dolrang baksa nangrime kamko ka·enga ineba ua aganaha.
Garo Hills-o songdongenggipa manderang ku·cholsan ong·genchimosa Tura-ko Winter ba Second Capital songchina dabiani be·en pil·na man·gen ineba ACHIK-ni education secretary parakataha.
Indake ong·engon, Tura-ko Winter/Second Capital songchina dabianio, Tura Government College Students Union (TGCSU)-ba ACHIK baksa bakrimaniko parakataha.
Tura-ko Winter Capital songchina dabianio ACHIK baksa bakrimaniko parakatengon, 1972 bilsio Meghalaya a·dokko man·chengani somoion Tura-ko Winter ba Second Capital songna gita dilgiparangni gisepo songgigrikani dongachim aro da·o Tura-ko Winter Capital songaniara Meghalaya a·dokko man·na krengdilanggipa pagitchamrangni jumangko chu·sokatani gita ong·genchim ine TGCSU-ni president Anand Ch Momin parakataha.
Tura-ko Winter Capital songkujaengani a·selsan a·dokni mongsonggipa jatgittamni gisepo meli-nangrimanirang dongjaenga aro a·dokni gipin mongsonggipa jatrang, Garo jat ba Garo Hills-ni gimin name ma·sitokkujaenga ineba TGCSU-ni president parakataha.
Bilsiantian Tura-ko October jaoni March jaona Second Capital songna nanga aro ia dabianiko chu·sokatkujaskal TGCSU-ba Tura-ko Winter Capital songchina dabianio ACHIK baksa bakrimangkugen ineba TGCSU-ni president parakataha.