SHILLONG: Meghalaya a·doko aro mongsongbate Garo Hills-o sorkari skul nokni obostarang namjabatrorengahani gimin ia 2023-24 bilsini gisepo komibeoba dam 1700 skul nokrangko a·dok sorkari taridapna tik ka·angaha.
Sorkari official saksani parakatani gitade, a·doko namjabatgipa skul nokrangko a·dok sorkari taridapna a·bachengaha.
Ia skul nokrangko taridapna gita sorkari gadang gittam dake jako ra·anggen ine janapatengon, ia dam 1700 skulrangko taridapna gita sorkari, kamrangko ka·engaha ine sorkari officer parakataha.
Ia skulrangko Group A-oni Group D-ona gadang done taridapgen ine janapatskaengon, je skul nokrangkon chu·gimik taridapna nangengachim, uandakgipa skulrangkode Group A-o, taridapna bang·kalgipa skulrangkode Group B-o aro bang·gija taridapna nanggipa skulrangkode Group C aro Group D-o done taridapanggen ine sorkari officer parakataha.
Batanggimin somoirango koborko on·ani gitade, Garo Hills-o bang·bata sorkari skul nokrangan obosta namsrangjaengahani a·sel lekka porani gita namen ja·manchakengahachim aro ia skul nokrangko ta·raken taridapna nangengahachim.
Indake ong·engon, a·doko aro mongsongbate Garo Hills-o lekka porani namen tang·onengani gimin sorkari, dingtangmancha am·sandianirangko dakaha ineba sorkari official-rang parakataha.