SHILLONG: A·doko roster system-ko ra·gatengon cut-off date ba sal tarikko donchina gita BJP, A·dok Sorkariko mol·molaha
Indake Roster System-ni bidingo ning·tue chanchirimchina gita BJP party-ni dolsa committee-ko songani ja·mano Cabinet Minister aro BJP MLA AL Hek ia kattarangko aganaha.
Roster System-ko ra·gatanio indita bilsioni ja·rikna nanggen ine High Court-ni ge·etanio maming janapani dongjani gimin, cut-off date-ko tik ka·china gita BJP, A·dok Sorkariko mol·molgen ine Hek aganaha.
Uamangni party, basakoni cut-off date-ko donako nangnikenga ine sing·on, sorkari baksako party party gimikko ba MDA tom·aniko ong·ata unosa iani bidingo chanchirimgen ine Cabinet minister aganchakaha.
Hek-ni aganani gitade, High Court-ni ge·etanio gitaba, cut-off date-ko State Cabinet tom·anio ong·jaoba Assembly-o chanchichina gitasa Sorkariko nangnikaha.
Iani bidingo chanchirimna gita MDA tom·aniko ong·atchina gitaba ua Chief Minister Conrad Sangma-ko aganman·aha ineba Hek aganaha.
Iani a·selan Garo aro Khasirangni gisepo bak ong·ani gimin sing·on, chinga jat gittam ru·uta bilsionin apsan tom·tome dongrimbaenga ine ua aganaha.
“Jatrangni gisepo an-ching maming dingtanggrikataniko ra·bana nangjawa,” Hek aganaha.
Reservation policy-ko nipiltaikujana kingkingde roster system-ko ra·gatkujachina gita VPP, A·dok Sorkariko didiahachim.
