TURA: West Garo Hills a·jani Nokrek a·bri jolo donggipa Sakal A·duma songo gital rikgipa Community Nursing Training Centre-ko ia anti dipet kulie chalaina a·bachengataha ine kobor on·aha.
Ia Nursing Training Centre-ko rikna gita Tura-ni A·chik Heritage Pursuits (AHP) dol dakchake on·aha aro ia nursing training centre-ko Tura-ni Christian Hospital Management Committee & Nursing School chalaienga.
Ia Nursing Training Centre-ko bilsi bonganade outreach program dake jakkalanggen aro ja·mano ia centre-ko sub-centre-ona ra·doatgen.
A·chik Heritage Pursuits (AHP)-ni president Prakash Momin-ni parakatani gitade, ia nursing training centre-ko rikna gita tangka paisarangko chimongna uamang, dingtang dingtang program-rangko ong·ataha aro uamangni program-rangko ong·atanio bang·a manderangan bakrangko ra·e tangka paisarangko on·giltokaha. Manderangni ka·sae on·gilanichi da·o ia training centre-ko bimang ong·atna man·aha aro ian da·o Sakal A·duma jolo donggipa dingtang dingtang songni manderangna sanna bananirangko on·na man·gnok ineba Momin, tangka paisa on·gilgipa manderangko mittelpilataha.
Momin-ni parakatani gitade, ia Nursing centre-ko kulianichi damchet songrang namgnirangko man·gnok aro ia songrangara, Daribokgre, Mandal Nokat, Sakalgre, Balladingre, Dura Kalakgre, Sasatgre, Chandigre aro Oragitok songrang ong·a. Da·o dipet ia damchet songni manderang, sanna bananirangko ra·na gita komibeoba kilometer 22-mang chel·ao donggipa Asanang-onasa re·angna gita nangtokengachim indiba da·ode joltangon nursing centre dongahani gimin ia songni manderangba maming neng·nikani grian sanna bananirangko ra·pana man·gnok ine AHP-ni president parakataha.
Ia Nursing training centre-ko rikna gita an·tangni a·ako ka·sabee on·ahani gimin ua dingtangmancha Sakal A·duma songni Poljonsing M Sangma-koba mittelpilataha.
