TURA: Re·anggipa Mongolbar salo, South Garo Hills a·jani Krishi Vigyan Kendra (KVK)-ni gita FSPF-ni ning·o NABARD-ni dakchakanichi, wak jilanichi an·tangtangna janggi tangani cholrangko tarie ra·ani bidingo agan-talate on·angan baksana wakni alrangkoba game ge·e cha·giparangna suale on·angaha.
Ia program-ko ong·atanio, South Garo Hills KVK-ni Head aro Senior Scientist, Dr Athokpam Haribhushan, jinmana aganprakengon, dingtang dingtang scheme aro program-rangko ra·gatanichi maikai songo noko manderangni janggi tangani gadangko namdapatna man·aha, uarangni gimin aganangaha.
Technical session-ni somoio, SGH KVK-ni SMS (Livestock Production) Dr Rupam Bhattacharya, wakrangko jilani bidingo agan-talate on·angenba, maikai wakrangna alrangko on·na nanga, uarangni gimin agan-skie on·angaha. Wakrangna an·seng baljokaniko on·ani giminba Dr Bhattacharya, game ge·e cha·giparangna agan-skie on·angaha.
Ia program-ko ong·atanio South Garo Hills a·jani Chokpot Block ning·o donggipa Asugre, Dagal Gopgre aro Daji Badima songni manderang bakko ra·angaha aro ia songgittamni sak 33 seoka man·gipa manderangna KVK-ni gita wak alrangko suale on·angaha.
