TURA: Sorkarini kamrango manderangni chu·ongnikani aro kusiniko nikna man·na gita da·o bilsi bongana Meghalaya a·dokni budget-o ‘Happiness Index’-koba jako ra·na a·dok sorkari tik ka·aha ine Bristibar salo, a·dokni Chief Minister Conrad K Sangma parakataha.
Meghalaya a·doko dilna gita re·bapiltaiani gimin a·dokni Chief Minister aro Assembly-ni Speaker Thomas A Sangma-na mande ra·pilskaani program-ko Tura-ni District Auditorium-o ong·atanio ia kattarangko Sangma aganaha.
“Sorkariko chalaianio manderangni kusi ong·anikoba nina nangao ga·aka aro chingni kamrangko ka·anio manderang chu·ongnikaniko aro kusiniko man·ama man·jaenga, uko chinga sorkari ong·e nina nanga. Sorkari aro sorkarini bilo pangnan manderangni bakrimaniko nanga,” ine Chief Minister aganaha.
Happiness Index-ko budget-o jako ra·na chanchichengani somoio bang·a manderangan jajae iani gimin uo sing·aha ineba ua parakataha.
“Iani miksonganiara mai aro iara maiko dakgen ine uamang ango sing·aha. Anga uamangna mingsakosan aganaiaha – kusinide a·paloni ong·na nangja indiba ning·onisa ong·na nanga. Manderang sorkariko chalaianio chu·ongnika ong·ode uamang kusi ong·enga,” ine Sangma aganaha.
Sorkari aro sorkarini bilko apsan re·atna gita uni sorkari on·kange kam ka·enga ine janapatengon, iani giminsa ia bilsioni bilsi bongana Happiness Index-koba a·dokni budget-o jako ra·na tik ka·aha ine Chief Minister parakataha.
