SHILLONG: Ia 2023 bilsini Meghalaya Legislative Assembly election-oba a·dokni Bharatiya Janata Party (BJP), name dakna man·jahani gimin re·baenggipa 2024 bilsini Lok Sabha election-o nambate daksana miksongenga.
BJP-ni state general secretary Dipayan Chakraborty-ni parakatani gitade, ia bilsini Assembly election-o BJP, a·dokni pilak dam 60 seat-rangon susae da·o pangchakanirang dongmanahani gimin ia dam 60 constituency-rangon uamang BJP-ko mangrakbatatna tik ka·aha.
Shillong Lok Sabha constituency-ara skangonin Congress dolni seat ong·enga ine janapatengon, da·ode Congress dol, Meghalaya a·doko aro mongsongbate Shillong constituency-oba bilgriaha aro re·baenggipa 2024 bilsioba a·songni Prime Minister Narendra Modi-an Prime Minister ong·e re·bapilgen ine manderang ma·sienga ine Chakraborty parakataha.
Ia bilsini Assembly election-o chu·sokjahani gimin re·baenggipa bilsini Lok Sabha election-na maikai tarisamsoenga ine sing·anina aganchakaniko on·angengon, Assembly election-oba BJP namen dakahachim aro dam 9-10 seat-rangode gnigipa biapko man·e dam 11 seat-rangode gittamgipa biapko man·rikskaaha ine BJP-ni state general secretary parakataha.
Uamangni hisapsoanio uamang maiba gualaniko dakaha ine janapatengon, uamang an·tangtangni dakgualanirangoniko bang·en skie ra·aha ine Chakraborty parakataha.
Common candidate ba apsan candidate-ko seokani bidingo sing·on, NPP-de NDA-o bakrimgimin dol ong·a aro uamang baksade ma·sichakgrikani dongaigen ine BJP-ni state general secretary parakataha.
“Da·o dipet iani bidingo NPP baksa agan-chanchirima dongkuja indiba NPP-ni saksa ba sakgni MP-rangko watatana batede BJP-ni MP-ko Delhi-ona watatna man·o nambatgen,” ine Chakraborty aganaha.
