SHILLONG: Sohiong constituency-na namroro silroroaniko ra·baanide National People’s Party (NPP)-ni candidate Samlin Malngiang aro a·dokni Chief Minister Conrad K Sangma-ni jakosa ong·ani gimin re·baenggipa May-ni 10 tariko ong·atenggipa Sohiong Assembly election-o NPP-ni candidate-ko seokanian Sohiong constituency-ni manderangna nambatgipa chol ong·enga ine Sonibar salo, a·dokni Deputy Chief Minister aro NPP-ni national vice president Prestone Tynsong parakataha.
Sonibar salo, NPP-ni candidate Samlin Malngiang-na campaign ka·na gita Rangshken-o manderangna aganprakangengon, NPP-chi dilanggipa gitcham MDA 1.0 sorkarioba NPP-ni candidate Samlin Malngiang, Cabinet-ni bak ong·paahani gimin ua NPP baksa meligipa ong·a ine Tynsong parakataha.
Ia Sohiong Assembly election-o NPP-ni candidate-ko seokgenchimode, NPP-ni sakchet minister-rang aro pilak ge 25 sorkari department-rangan, Sohiong constituency-o namroro silroroaniko ra·bana kamrangko ka·gen ineba ua ku·rachakaniko on·angaha.
“Indiba ia election-o na·simang gipin dolni candidate-ko seoke gualaniko dakgenchimode namroro silroroaniko ra·baanio neng·nikanirangko man·naba gnang. Na·simangni seoke watatgipa candidate-de Secretariat-o maikai kamrangko ka·a, uko sandianion bilsisade bate nangaigen. Ua angni chamber-ona re·baoba haida anga una cha cup-sakoba on·e ringjanaba gnang aro ua chang 101 angko grongeani ja·mansa haida anga una maikoba on·naba gnang,” ine NPP-ni national vice president aganaha.
A·dokni gipin dam 59 constituency-rang da·o ia cholko man·na siktokengon, ia cholko ra·rikjagenchimode Sohiong constituency-ni manderang gokarangsa ong·aignok ineba Tynsong parakataha.
“Uni gimin da·o robolde na·simangni jakonjok aro na·simang an·tangtangni mikkangchina name chanchina nangenga,” ineba ua aganaha.
