SHILLONG: NITI Aayog-ni ning·o Meghalaya a·dokni namroro silroroanina gipin a·songrangni dakchakanirangko on·angkuchina gita a·dokni Chief Minister Conrad K Sangma didiataha.
Gipin a·songrangni dakchake on·enggipa dingtang dintang project-rangko Meghalaya a·doko ka·engaha aro NITI Aayog-ni dakchakanichi iandakgipa project-rangko Meghalaya a·dokona ra·bakuna nanga ineba Chief Minister, adita salrangna skang, NITI Aayog-ni official-rang baksa tom·anio aganaha.
Chief Minister-ni aganani gitade, Meghalaya a·dokko man·chape salgro salaramni dingtang dingtang a·dokrang, namroro silroroaniko ra·bana Bangladesh, Bhutan, Nepal aro uandakgipa a·song baksa bakrime kamko ka·enga.
Meghalaya a·doko ka·enggipa project-rangni gimin janapatengon, Garo Hills-ni Hilli-Mahendraganj rama aro Phulbari dolongni giminba ua janapataha.
Garo Hills-o Mendipathar-Dudhnoi rel ramana agreba, West Bengal a·dokni Balurghat-Hili-oni Bangladesh a·songni Gaibandha gita Mahendraganj-Tura rel ramakoba tarienga ine Chief Minister aganaha. Bangladesh a·song gita a·dok damgniko nangdimate tarienggipa ia rel ramako gong kror 7000 koroschi tarienga aro ia rel ramako tarimanahaode ian West Bengal a·dokni South Dinajpur aro Meghalaya a·dokni Garo Hills-na mongsonggipa project ong·gnok ineba Chief Minister parakataha.
Assam aro Meghalaya a·dok damgnini simao, Brahmaputra chibimako kabatenggipa km 19-ni Dhubri-Phulbari dolongni bidingo janapatskaengon, ia dolongko 2026-27 bilsio matchotani ong·enga ine Chief Minister parakataha.
Meghalaya aro Bangladesh a·songni gisepo, mongsongbate Dalu aro Dawki-o bading chiwalgrikani giminba a·dokni Chief Minister Conrad Sangma, Niti Aayog-ni official-rang baksa tom·anio chanchirimangaha.