TURA: Assam aro Meghalaya a·dokko nangdimeatgipa Agia-Medhipara-Phulbari-Tura (AMPT) ramako tarigipa company M/S MP Agarwalla, ramako name tarijahani a·sel da·on ia rama nosto ong·na a·bachengengaha ine Phulbari-ni dolgni NGO-rang, chong·motan Garo Students Union (GSU) aro A·chik Youth Welfare Organisation (AYWO) parakatenba, mikkangchi ia company-na iandakgipa rama tariani kamrangko on·taijachina gita West Garo Hills a·jani Deputy Commissioner-na sedoataha.
West Garo Hills a·jani Deputy Commissioner-na sedoatgipa chittio GSU Phulbari unit-ni president Nyezer Chuang R Marak aro AYWO Phulbari unit-ni president Dalseng M Sangma-ni parakatani gitade, ia AMPT ramara Phulbari aro samba jolrango donggipa songrangna mongsonggipa ramasan ong·aigija skul aro college-rangchi re·enggipa chatro chatrirangnaba mongsonggipa rama ong·engachim indiba ia ramako tarigipa M/S MP Agarwalla company, kamrangko name ka·jahani a·sel da·o ia ramani obosta skangona baten namjabatsrangahachim.
Ia ramao da·o a·kolrara aro ramao be·anirangko nikna man·engahani a·selan re·ruraenggipa manderangna namen neng·nikanirangko on·enga aro garirangkoba nosto ka·enga ine GSU aro AYWO Phulbari unit-rang parakataha.
Da·o wachi kari sokbaengahaon, ua ramako name tarijahani a·sel skul, college-rangchi re·enggipa chatro chatrirang bang·en neng·nikanirangko chagrongna nangtokgnok ineba GSU aro AYWO dolrang, suk ong·gijaniko parakataha.
Ia rama da·o ta·raken nosto ong·angengahani gimin ian para salruraenggipa garirangna aro garirango songreenggipa manderangnaba bang·a neng·nikanirangko on·engaha ineba dolgni NGO-rang parakataha.
GSU aro AYWO Phulbari unit-rangni parakatani gitade, Garo Hills-o PMGSY-ko man·chape dingtang dingtang ramarangko tarianioba Guwahati-oni M/S Agarwalla-ko bang·en badi ka·anirangko knasona man·ahachim.
Uandaken ia company-ni kosako ta·raken ja·kuko de·china aro mikkangchi iandakgipa ramarangko tarina on·taijachina gitaba GSU aro AYWO dolrang, West Garo Hills a·jani Deputy Commissioner-ko didiataha.
AMPT ramako tarigipa company-ni kosako Phulbari-ni NGO-rang badi ka·a
Date:
Share post:
