TURA: Ja·manchake koborko man·soani gitade, re·anggipa Sombar attamo, Bangladesh a·songoni niam gri re·napbagipa mande saksako, South West Garo Hills a·jao donggipa Purakhasia jolni manderang jinma rim·e dokaha aro ia mande ja·mano saknaanirangko man·e siangaha.
Koborko on·ani gitade, Sombar attamo Bangladesh a·songoni niam gri India a·songo napbagipa mande sakgittamko BSF-ni sipairang nikrikahachim indiba ia manderangko BSF sipairang rim·rikna man·jahachim.
Ia mande sakgittamoni saksa Monirul Hussain minggipade, Purakhasia jolchipak re·angaha indiba uko songni manderang jinma rim·na man·aha.
Batanggimin sal somoirangonin Bangladesh a·songoni niam gri re·napbagipa manderang, ia jolrango donggipa matchu matte, motorcycle aro uandakgipa ma·manti bosturangko cha·ue ra·angrongengani gimin songni manderang, an·tangtangan songo noko nirikkianirangko dakengachim aro uandaken Sombar walo, Bangladesh a·songoni niam gri re·napbagipa mandekoba songni manderang jinma rim·aha aro songni gam-jinrangko cha·ue katrongengani gimin ka·a ding·chaoe jinma dokaha.
Iani bidingo police-rangna kobor on·atani ja·man police-rang, ua biapona re·ange ia mandeko rim·eaha aro manderangni jako dokako man·e saknaanirangko man·ahani gimin uko bakan Tura Civil Hospital-ona ra·angahachim indiba ia mande Mongolbar pring 7:40 bajimang siangaha ine police official-rang parakataha.
Ia mandeko songni manderang sing·sandion, ua ganja brena gita India a·songona re·napbaahachim ine ku·rachakaha ine kobor on·aha.
