SHILLONG: Adita salrangna skang, Sohiong Assembly election-na campaign ka·engmiting somoio, NPP-ni candidate-ko seokgiparangsan MLA scheme-ni namgnirangko man·aigen ine a·dokni Deputy Chief Minister aro NPP-ni national vice president Prestone Tynsong-ni agananiko Khun Hynniewtrep National Awakening Movement (KHNAM) raken jegalataha.
Sohiong Assembly Constituency-ni election-na campaign ka·anio Tynsong-ni agangipa kattarangko jegalatengon, Tynsong-ni aganani kride bilsi bongana gong kror 12.5 tangkarangko MLA sakprakna on·enggipa tangkarangara Election Commission of India (ECI)-ni dongimin niamrangko pe·e dilgiparang an·tangtangni skani gita koros ka·china indin on·enggipa tangka paisarang gitasa ong·engaha ine KHNAM-ni vice president Thomas Passah parakataha.
Deputy Chief Minister-ni agangipa kattarangara, MLA scheme-ko bon·atchina dabienggipana namgipa sakki gita ong·aha ineba Passah aganaha.
“Kamrangko nambate aro somoi gita matchotatna man·na gita pilak namroro silroroani kamrangkon BDO ba district administration gitasa ka·atna nanga aro iandakgenchimosa bading chiwalgiparangba, an·tangtangni man·gnina politics-o napangna gisik nangjawa,” ine KHNAM-ni vice president aganaha.
Ia Sohiong Assembly election-o NPP-ni candidate-ko seokgenchimode, NPP-ni sakchet minister-rang aro pilak ge 25 sorkari department-rangan, Sohiong constituency-o namroro silroroaniko ra·bana kamrangko ka·gen ine re·anggipa Sonibar salo, a·dokni Deputy Chief Minister Prestone Tynsong, Sohiong constituency-ni manderangna ku·rachakaniko on·angahachim.
“Indiba ia election-o na·simang gipin dolni candidate-ko seoke gualaniko dakgenchimode namroro silroroaniko ra·baanio neng·nikanirangko man·naba gnang. Na·simangni seoke watatgipa candidate-de Secretariat-o maikai kamrangko ka·a, uko sandianion bilsisade bate nangaigen. Ua angni chamber-ona re·baoba haida anga una cha cup-sakoba on·e ringjanaba gnang aro ua chang 101 angko grongeani ja·mansa haida anga una maikoba on·naba gnang,” ine NPP-ni national vice president aganahachim.
A·dokni gipin dam 59 constituency-rang da·o ia cholko man·na siktokengon, ia cholko ra·rikjagenchimode Sohiong constituency-ni manderang gokarangsa ong·aignok ineba Tynsong aganahachim.