TURA: 2015 bilsio West Garo Hills a·jani ning·o donggipa Oragitok songni Nokmani depante Sengbath Ch Marak-ko police-rangni so·otgipani bidingo Centra Bureau of Investigation (CBI)-chi inquiry-ko dakchina ba sandirokchina gita Meghalaya High Court, ge·etaniko on·ataha.
2015 bilsini March 4 tariko, Garo National Liberation Army (GNLA) bobil dolni manderang, Oragitok songni Romba Adinggre LP skul noko dongnuchakenga ine police-rang kobor man·soani ja·man bobil dolni manderangko chadrapeaha ine police-rang a·kangahachim.
Police-rangni ua somoio a·kangani gitade, bobil dolni manderangko bame on·china aganon uamang police-rangko gochengahani giminsa police-rang gochakskaahachim.
Ua somoio bilsi 33 ong·gipa Sengbath Marak-ko uni skul nokoni ong·katbaon uni ja·ao gochengaha aro ja·mano ua biaponi ua katna jotton ka·ahani gimin police-rang uko goaha ineba police-rang a·kangahachim.
Bobil dolni manderang baksa gogrikani ja·man police-rang, a·songo tarigipa pistol pongsa baksana so·ota man·gipa mandeara GNLA-ni mande ine sakki on·gipa lekkarangko man·aha ineba a·kangahachim.
Indake ong·genchimoba, police-rangni iandake a·kanganiko songni manderang raken jegalskaaha aro police-rang, golpo taridraesa dosgri mandeko goe galaha ine matnangtokaha.
Ia a·sel ong·anio jak donggipa police-rangara, ua somoio Tura Sadar Police Station-ni CI ong·enggipa BN Marak, Rongram-ni in-charge BA Bamon aro Mingran T Sangma ong·achim.
Ia obosta ong·ani ja·mano, so·otako man·gipa Sengbath-ni pagipa Abal M Sangma, an·tangni degipako tol·e so·otaha ine matnangenba, Rongram beat house-o FIR ka·aha aro uni ja·man High Court-o mokordoma ka·aha.
Ua somoio a·sel ong·aniko nikgipa manderangni aganani gitade, Sengbath-ni noko saksan ong·engmiting somoio police-rang, uamangni nokko ro·ongrangchi goe uko nokoni ong·katchina aganaha. Police-rangni ge·eta gitan ua nokoni ong·katbaengachim indiba uni ong·katbamitingon police-rang uni ja·ao gochengaha aro uni katna jotton ka·on police-rang uko gotaiaha.
Sengbath-ko ua somoio gochenggipara Mingran Sangma ong·achim aro uni ja·man ua biapo donggipa police-rang jinma uko goe galaha ineba kobor on·timgiparang parakaha.
Indake ong·engon, ia a·selni bidingo High Court, Mongolbar salo hearing-ko dake, ia a·selni bidingo CBI-ni sandirokchina ge·etaniko on·angaha.
