TURA: East Garo Hills a·jani Bansinggre songo, Jal Jeevan Mission (JJM)-ni kamrangko name ka·jani a·sel songni nokni manderang chirangko man·tokjaenga ine A·chik Organisation for Social Welfare (AOSW), suk ong·gijaniko parakataha.
AOSW-ni vice president Tambu Sangma-ni parakatani gitade, songo noko donggipa nokantionan chirangko sokate on·na gitasa ia JJM-ko ma·mong sorkari ra·gatahachim indiba Bansinggre songo rikgipa chi tengkini obosta namsrangjani a·sel ia tengki da·on be·prakangengaha aro songo noko bang·bata nokdangrangan chirangko soke man·tokkujaengachim.
“Ia songni mitam nokdangrangde an·tangtangni koroschi main pipe-oniko chi ra·ange chirangko man·paenga indiba bang·bata nokdangrangan chirangko man·tokjaenga. Ia chi tengkiko rikani namsrangjani a·selan da·o be·angengaha aro ia tengkio chirangkoba chimongna man·jaenga,” ine AOSW-ni vice president parakatenba, ia pilakan JJM-ni kamko jako ra·e kam ka·gipa contractor aro official-rangni tangka jakkalsretaniko mesokani ong·enga ine parakataha.
Iani bidingo ta·raken inquiry-ko dakenba, dos donggipa contractor aro official-rangni kosako ja·kurangko de·china gitaba AOSW dabiangaha.
“Iandake songni nokni namgnina on·enggipa kamrangko an·tangtangni man·gnina chanchie kam ka·enggipa official aro contractor-rangko chinga raken jegalenga,” ine AOSW-ni vice president parakataha.
