RESUBELPARA: Meghalaya a·dokko ta·makku jakkalani gri ong·atna sorkari dingtangmancha ja·kuko de·chakatengon, adita salrangna skang ‘World No Tobacco Day 2023’ campaign-ko a·doko a·bachengataha aro North Garo Hills a·jaoba ia campaign-ni bak gita dingtang dingtang skulrango poraienggipa chatro chatrirang, ta·makku jakkalaniko dontongchina didie, jinma re·jomanirangko dakangaha.
Re·jomanirangko ong·atangan baksana ia campaign-ni bak gita dingtangmancha signature campaign-rangkoba ong·atenga, jeon dingtang dingtang skulni chatro chatrirang aro skigiparang bakko ra·angtokenga.
Manderangna mikrakataniko on·anio nambatgipa skulrangna, chong·motan Primary, Upper Primary, Secondary aro Higher Secondary School-ni gadangrango seokanirangkoba dakanggen aro a·jao ia nambatgipa skulrangko state level-o bak ra·atskagen ine kobor on·aha.
Ia ‘World No Tobacco Day 2023’ campaign-ni bak gita pilak skulrangon ta·makku jakkalaniko jegale re·jomaniko aro signature campaign ba jinma soi ka·aniko ong·atenga aro ia campaign-ko re·baenggipa May-ni 31 tariko World No Tobacco Day-ko manianio matchotatgen.
