AMPATI: Bristibar salo, South West Garo Hills a·jani Deputy Commissioner aro District Health Society-ni Chairman RP Marak, District Grievance Redressal Committee aro District Task Force baksa Ampati Circuit House-o tom·aniko ong·atangenba, an·seng baljokaniko on·na ka·enggipa kamrangko nipilangaha.
Ia tom·anio South West Garo Hills a·jani DM&HO Dr Himangshu Barman, Ampati Civil Hospital-ni MS Dr Denisha Momin, SDMO Dr S Hajong, medical officer-rang, pilak health program-ni nodal officer-rang aro CHC, PHC baksana sub-centre-rangni MO in-charge-rangba bakko ra·angaha.
Ia tom·anio South West Garo Hills a·jani gital Deputy Commissioner RP Marak, health official-rang baksa chanchirimengon, manderangna an·seng baljokaniko on·anian mongsonggipa daito ong·ani gimin kamko ka·enggipa pilakan an·tangtangni man·a gita nambate kamrangko ka·na nanga ine didianiko on·angaha.
South West Garo Hills a·jao tika su·ani, ma·gipa aro bi·sarangna an·seng baljokaniko on·ani, hospital-rango an·pakani aro uandakgipa pilak kamrangon namenga ine janapatengon, a·jao bi·sa bakgitchak aro an·pakani somoio ma·giparangni sianiko komiatna nambate kamko ka·china Health official-rangko aro medical-o kam ka·enggipa pilakkon Marak didiangaha.
Kam ka·enggipa manderangni nanganirangko aro neng·nikanirangko nie ra·na gita ua bakan sanchakram biaprangko nianggen ineba Deputy Commissioner ku·rachakaniko on·angaha.
Ia tom·aniko DMHO aro District Health Society-ni Member Secretary Dr H Barman dilangaha aro tom·anio MCH-ni Medical Officer in-charge Dr Noreen Sangma, immunization aro MCH-ni kamrangni gimin agan-talate on·angaha aro MHIS-ni DPM Shankar, MHIS-ni kamrangni gimin talate on·angskaaha.
