SHILLONG: Sombar salo, Shillong songjinmao songdongenggipa Manipur a·dokni Kuki aro gipin jatni dilgiparang, a·dokni Chief Minister Conrad Sangma-ko gronge, an·tangtangni neng·nikanirangko niatchina mol·moleaha aro uamangni neng·nikanirangko niatna gita Chief Minister, ku·rachakaniko on·ataha.
“Uamang India sorkarini gadangoba angko agangrikchina mol·molaha aro anga political dolni gita aro Chief Minister-ni gitaba ma·mong sorkari baksa agangrikna ku·rachakataha,” ine Kuki aro dingtang dingtang jatni dilgiparangko grongani ja·man Chief Minister aganaha.
Ia tom·ani bidingo talataniko on·angengon, “Manipur a·doko neng·nikanirangko chagrongna nangengmiting somoirango Meghalaya a·doko songdongenggipa ia jatrangni nokdangrangko naljokaniona rimongkatanio dakchakanirangko on·china gitaba uamang angko mol·molaha aro anga je chol man·a gitade uamangna dakchakanirangko on·na ku·rachakataha. Ian uamangna namen rakbegipa somoi ong·enga ine sorkari ma·sichakengani gimin dakchakanirangko nangenggipa manderangna a·dok sorkari man·a gita dakchakanirangko on·gen,” ine Sangma aganaha.
Manipur a·doko songdongenggipa manderangna didiani kattarangko aganatskaengon, “Maiba neng·nikani ba ma·sisretgrikanirang donggenchimode an·ching pangnan apsan asonge agangrikanichisa namatna man·a aro maming dakeba dakgrik dinggrikanichide namatna man·jawa. Uni gimin Manipur-o songdongenggipa manderang pilakkon tom·tomaniko ra·bapilna gita kamko ka·china aro so·sojengjeng ong·aoni chel·e dongchina mol·molenga,” ine Chief Minister parakataha.
Indake ong·engon, da·o dipet Manipur-o jachange dongna nangenggipa manderangoni sak 300-na baten manderangko Meghalaya a·dokona naljokani gnang rimongkatbana man·aha ine Chief Minister parakatenba, da·o Manipur-o bang·gija manderangsan jachange dongna nangkuenga aro mitamrangde biaptangtangon dongrikna nangniktokenga ine talataniko on·angaha.
“Chinga agangrikanirangko dakengkua aro uamangko sokbapilatna gita cholrangko nienga. Una agrede noktangtangona re·bapilna sikgipa chatro chatrirang pilakan biaptangtangona sokbapiltokaha,” ine Sangma aganaha.