SHILLONG: Cannes Film Festival-na Commander Shangpliang aro Nicholas Lemtor-ni bimingko mingani ja·man adita meligrikgijanirangko nikna man·ahani gimin Mongolbar salo, a·dokni Information & Public Relations (IPR) Minister Ampareen Lyngdoh, Art & Culture, IPR aro Tourism department-ni official-rang baksa tom·e chanchirimangenba, ia Cannes Film Festival-o bakko ra·na gita A·chikrangoni jawilwat tarianio mingsing minggamako man·gipa Dominic Sangma-koba seokchina ma·mongni Information & Broadcasting Ministry-na recommend ka·na gita manchiangaha.
Koborko on·ani gitade, Cannes Film Festival-o bakko ra·na seokako man·gipa manderangoni saksa Nicholas Lemtor Kharkongor, ia festival-o bak ra·jana gita tik ka·ahani gimin a·dok sorkari, uni biapo Dominic Sangma-ko watatskachina ma·mongni Information & Broadcasting Ministry-ko didiataha.
A·chikrangoni jawilwat tariana mingsing minggamako man·gipa aro dingtang dingtang award-rangko man·gipa Dominic Sangma-ko Cannes Film Festival 2023-oniko watchanggalahani gimin adita salrangna skangsan, Tura-ni Society of A·chik Film & Entertainment (SAFE) dol, suk ong·gijaniko parakatahachim.
Dominic Sangma-ni bimingko Art & Culture Department aro Information & Public Relations-ni Director-ba recommend ka·atani ja·man bon·kamgipa somoio, Cannes Film Festival-ona watatna segimin delegate-rangoniko uni bimingko den·galpilahani gimin SAFE dol, suk ong·gijaniko parakatahachim.
Indake ong·engon, mikkangchi iandake international ba national film festival-rangko bakko ra·na gita delegate-rangko seokna dingtangmancha Chief Secretary-ni dilanichi selection committee-ko songe donanggen ineba ia tom·anio tik ka·e donangaha.
