SHILLONG: Ia 2023 bilsini Assembly election-o a·doko songdongenggipa manderangni namgnike seokaniko mande ra·na nanga ine Budbar salo, UDP-ni dilgipa aro Cabinet Minister Paul Lyngdoh parakataha.
NPP aro UDP-ni gisepo gisik sagrikani aro UDP-ko sorkarioniko ra·galani cholrang dongama ine sing·anina Lyngdoh, ia kattarangko aganaha.
Sohiong election-ni bidingo janapatengon, ia election-koba gipin dam 59 constituency-rang baksa apsan ong·atani ong·achim indiba rasong grie uamangni candidate-ko gimaatna nangahani gimin ia election-ko da·al ong·atskana nanga indiba dolgnini gisepo maming gisik sagrikani dongja ine Lyngdoh parakataha.
“Manderang jekoba agane ronade man·aia indiba chinga pilakan a·dokni namgnina kamko ka·nasa re·baaha aro anga an·tangde iandake chanchichipe agananirango bebera·gipa ong·ja,” ine UDP MLA aganaha.
Sohiong election-ni ja·mande a·doko politics-ni dingtanganiko nikna man·gnok ine Deputy Chief Minister Prestone Tynsong-ni agangipa kattarangni gimin sing·on, “Iandakgipa kattarangko agane ronade uan nambatgipa ong·aia indiba angni agangimin gita 2023 bilsio manderangni namnike seokaniko mande ra·na nanga,” ine Lyngdoh parakataha.
Ia bilsini Assembly election-o manderang NPP-na dam 26 seat-rangko aro UDP-na dam 11 seat-rangko on·ahani a·selsa darangba an·tangaride sorkariko rikna man·jaha ine janapatengon, “Ia election-ni result-ko name hisape nigenchimode Garo Hills-chipak NPP-ko bate seokaha aro Khasi-Jaintia Hills-chipak UDP-ko bate seokaha indiba dolgniko nangrimatesa MDA 2.0 sorkari ong·kataha,” ine Lyngdoh parakataha.
Gipin dolrangko bakrimchina NPP-ni didienggipani gimin janapatengon, “Chingaba NPP-ko ching baksa bakrimchina didiskaenga,” ine ua aganaha.
Sohiong election-ko cheani cholrangni gimin janapatskaengon, “Batanggimin chang Assembly-oba chinga sakdok MLA-rang dongachim aro da·o Sohiong-ko chegenchimode chinga dam 12 seat-rang ong·e UDP-ni bilko bariatna man·gnokchim. Indiba chinga Sohiong seat-ko chena ka·donganirang dongenga,” ine UDP MLA parakataha.
