SHILLONG: Roster system-ni bidingo chanchiani kamara niam gitade Assembly, Cabinet aro seokako man·gipa membor-rangni chanchina nanganisa ong·ani gimin kamko ua gadangon donode nambatgen ine Budbar salo, a·dokni Cabinet Minister aro UDP-ni dilgipa Paul Lyngdoh parakataha.
Reservation policy-ko gital dake nipiltaichina aro roster system-ko ra·gatkujaskal, kam on·anirangko dontongkuchina dabie VPP-ni dilgiparang, ramao re·jomaniko ong·atna miksongenggipani gimin sing·anina Lyngdoh, ia kattarangko aganaha.
“Uamango maiba miksongani gnangsa uamangba political dol ong·enga aro uamang an·tangtangni kamrangko chu·sokatchina. Indiba uamang MLA-rang ong·e, iandakgipa kamrangko jako ra·anio ariko badejawa aro tom·tome donganiko golmal ka·jawa ine anga ka·donga. Ia kamara niam gitade Assembly, Cabinet aro seokako man·gipa membor-rangni chanchiani kamsa ong·a,” ine Lyngdoh aganaha.
Chief Minister an·tangan Sohiong Assembly election matchotani ja·man, pilak dolrang baksa aro Cabinet-oba iani bidingo chanchigen ine aganmanahani gimin iako ua gadangon donode nambatgen ineba Lyngdoh aganaha.
Roster system aro reservation policy-ara nangchakgrikgipa kamrangan ong·ani gimin iani bidingo sorkari chanchigen aro iani bidingo saksanaride chanchina man·jawa ineba UDP-ni MLA parakataha.
Roster system-ni bidingo pilakan an·tangtangni nangnikanirangde dongaigen indiba pilakni nangnikanirangko ra·ani ja·mansa sorkari, ja·kuko de·gen ineba Lyngdoh parakataha.
