SHILLONG: Sohiong Assembly constituency-ni gital MLA-ko seokna gita Budbar salo election-ko ong·atangaha aro ia election-o manderangni pu·onani 91.87 percent gapaha ine Budbar attamo, a·dokni Chief Electoral Officer (CEO) FR Kharkongor parakataha.
Sohiong Assembly constituency-ni dam 63 polling station-rango pu·onaniko pring 7:00 bajion a·bachengataha aro attamni 4:00 bajion matchotani ong·achim indiba badiaba badiaba polling station-rangode attamni 6:00 bajimangonan matchotkujachim ine CEO parakataha.
Meghalaya Assembly-ni gipin dam 59 constituency-rangode re·anggipa February 27 tarikon election-ko ong·atahaoba, Meghalaya a·dokni gitcham home minister aro Sohiong constituency-o UDP-ni candidate ong·e susanagipa HDR Lyngdoh sagi, February-ni 20 tariko siangahani gimin Sohiong Assembly constituency-ni election-kode ra·doatenba, mijal May-ni 10 tariko ong·atskaahachim.
Sohiong constituency-o pu·one seokna man·gipa manderang gimik sak 34,783 manderang donga aro ianoni sak 17,096-de me·asarang aro sak 17,687-de me·chikrang ong·achim.
CEO FR Kharkongor-ni parakatani gitade, Sohiong election-ko name matchotatna man·na dol 5 central armed police force (CAPF)-rangko donataha aro election-ni somoio badiaba badiaba biaprangoniko niam gri palgipa churangko rim·ana agrede maming a·sel ong·anirangko knasona man·jaha.
Kharkongor-ni u·iatani gitade, Budbar salni 2:00 bajimango, Excise department-ni manderang, Sohiong constituency-ni ning·o donggipa Mawkohtep songoniko litre 1450.70 ong·gipa IMFL ba India a·songo tarigimin foreign churangko rim·na man·aha aro ia churangni damara gong lak 4-mang ong·achim.
Ia chang Sohiong Assembly election-na Election Commission, dingtangmancha me·chikrangni flying squad-rang, me·chikrangni polling station aro chadamberangni chalaigipa polling station-rangkoba donataha ine CEO parakataha.
Una agreba Nongpathaw polling station-o pu·ongiparang, pu·onani ja·man dingtangmancha bol chararangko ge·tokaha ineba Kharkongor parakataha.
Ia Sohiong Assembly election-o susaenggipa candidate-rangara, UDP-ni Synshar Lyngdoh Thabah, NPP-ni Samlin Malngiang, Congress-ni S Osborne Kharjana, HSPDP-ni Sandondor Ryntathiang, BJP-ni Seraph Eric Kharbuki aro TMC-ni Stodingstar Thabah ong·engachim.
Election-ni result-ko re·baenggipa May 13 tariko parakatskana siengachim.
