U·IATTIMGIPAONI
BAGHMARA: Bristibar salo, South Garo Hills a·jani Meghalaya Basin Development Agency (MBDA), MLAMP project-ni ning·o Knowledge Sharing Workshop-ko Baghmara-ni DRDA Training Hall-o ong·atangaha aro ia program-ko ong·atanio South Garo Hills a·jani Additional Deputy Commissioner Dr Regina Ch Marak, mongsonggipa sokgipa ong·e bakko ra·angaha.
Ia workshop-ko ong·atanio Dr Marak, jinmana aganprakangengon, sorkarini ra·gate on·gipa dingtang dingtang project-rangko chu·sokgipa ong·atanio bakrimaniko on·ahani gimin songni nokni manderangko mittelpilangaha. “MBDA project-rangara, songadam nokadamrangna ra·gatgipa project-rang ong·e, manderangni bakrimanichisa chu·sokgipa ong·na man·a,” ine ua aganaha.
Ia sal somoirango ding·anirang batroroengahani gimin mikkangchi iandakgipa ding·anirangko komiatna man·na gita rakgipa niamrangko done bolrangko ge·china aro ripingchina gitaba Dr Marak didiangaha.
A·ba so·e cha·anichi samtangtango ong·telaigiparangko nisigalgija, bol wa·arangko ripingna man·na gita Science-ni bewalo ba niamo pangchake gama ge·anirangko dakna nangengani giminba ua aganangaha.
Songadam nokadamrango ba·ra dokani aro kilding dol·ani kamrangko skie ra·anichi ma·gitchamrangni dakbewal rikbewalko tange rakkiangkuchina gitaba South Garo Hills a·jani ADC didiangaha.
Ia workshop-ko ong·atanio, South Garo Hills a·jani ADC aro Chokpot-ni SDO PR Marak-ba jinmana aganprakangengon, MBDA-ni a·bachengatgipa project-rangko songadam nokadamrango chu·sokate on·anichi manderangni janggi tangani gadangko namdapatchina gita didianiko on·angaha.
Ia workshop-ko ong·atanio MBDA-ni DPM Brilliar Ch Marak aro gipin officer-rangba dongpae jinmana aganprakangaha.