U·IATTIMGIPAONI
TURA: Re·anggipa Budbar salo, North Garo Hills a·jani Mendipathar jolo mikka balwa ta·rakanganio bang·en bol wa·arang, nok-jamrang aro bijoli krongrang nosto ka·ako man·angaha aro uandaken Mendipathar jolrango manderang bijoli gri ong·e dongna nangtokaha.
Kobor on·timgiparangni u·iatani gitade, Bristibar salo mikka balwa ta·rakanganichi bang·en bolrang be·e Mendipathar-ona salanggipa bijoli silitingrangko be·dapaha aro ua somoionin manderang bijoli gri ong·e dongna nangtokaha.
Mikka balwa ta·rakanganichi da·o dipet manderangni saknaa man·ani ba sianirangko knasoa dongkuja ine janapatengon, Mendipathar-o bijoliko man·piltaina komibeoba salgni ba salgittamkode nangnaba donga ine kobor on·timgiparang parakataha.
Indake ong·engon, mikka balwa ta·rakanganichi bol wa·arang be·e ramarangba champengatako man·tokahani gimin district official-rang ta·raken jabolrangko aro bolrangko rongtalatpilna kam ka·aha aro ramarangko re·rurana watpiltaina man·aha ine kobor on·timgiparang parakataha.
Mendipathar jolo ta·raken bijoliko on·piltaina gita official-rang rakbee kamko ka·enga ineba u·iataha.