U·IATTIMGIPAONI
SHILLONG: Sohiong Assembly election-ni ja·man MDA 2.0 sorkario dingtanganiko niknaba gnang ine jangbingbanganiko, National People’s Party (NPP)-ni dilgipa aro a·dokni Deputy Chief Minister Sniawbhalang Dhar jegalatenba, da·o dipet MDA sorkario bakrimenggipa dolrang pilakan ku·cholsan ong·enga aro sorkario dingtangani dongkujawa ine parakataha.
Sohiong Assembly constituency-ni election-ko Budbar salo ong·atangahachim aro election-ni result-ko Sonibar salo parakna siengachim.
Dhar-ni parakatani gitade, MDA 2.0 sorkario bakrimenggipa dolrangni gisepo da·o dipet meli nangrimanirang bilakenga aro Sohiong election-ni ja·manoba dingtanganirangko ua nikjaenga.
NPP aro UDP dolni gisepo matnanggrikani bidingo janapatskaengon, ia pilakan election-na aganprakanio matnanggrikanirangsan ong·aia aro election-o ong·a obostarangde election-osan ong·aia ine Dhar parakataha.
Sohiong seat-ko sawa chena ka·dongenga ine sing·on, iakode election-ni salosa ma·sina man·aigen, maina pilak dolrangan an·tangtangni candidate-rang chegipa ong·na ka·dongtokenga ine NPP-ni dilgipa parakataha.
“NPP-ba NPP chegen ine aganaigen aro UDP-ba uamang chegen ine aganaigen. Sawa chea ukode an·ching election-ni result-na senge nikuna,” ine ua aganaha.
