SHILLONG: Meghalaya a·doko niamo pangchake koelarangko bikottaina on·engon, bang·bata koela bikotgipa manderangni licence-na dorgasto galaniko ma·mong sorkarina watatjaha ine Meghalaya Pradesh Congress Committee (MPCC)-ni president Vincent H Pala, NPP-chi dilenggipa MDA sorkari 2.0-ko matnangataha.
“Komibeoba sak 17 ba sak 18 koela bikotgipa manderangni dorgastorang a·dok sorkarini jakon ong·kuenga ine kobor man·soaha. Ia manderangni dorgastorangko ma·mong sorkariona watatna nangnikenga ong·ode sorkarina chakpaaniko on·na nanggen ine ia manderangko aganaha ineba anga kobor man·soaha,” ine Pala aganaha.
A·doko koela bikotaniko a·bachengatna a·dok sorkari nangnikbebeenga ong·ode, a·doko koela bikotgipa manderangni dorgastorangko ma·mong sorkarina watate, ia manderangna dakchakanirangko on·na nangachim ineba MPCC-ni president aganaha.
Meghalaya a·doko a·arangara manderangnisa ong·a aro iako sorkari ma·sina nanga ine janapatengon, iandake koela bikotgipa manderangni dorgastorangko a·dok sorkarini ra·chipe donganiara kragijani ong·a ine Pala parakataha.
“Mande sakantian an·tangtangni namnikgipa bading chiwalanirangko dake cha·na bil donga aro sorkarini iandake mikkang niteaniara kraani ong·ja. Chief Minister Conrad K Sangma an·tangan Mining & Geology department-niba in-charge ong·e iandakgipa bewalko ja·rikna nangja,” ine ua aganaha.
Pala-ni aganani gitade, da·o dipet koela bikotgipa mande sakbrisan ma·mong sorkarioniko licence-rangko man·sokuengani gimin a·doko koela bikottaina man·gen ine ua an·tangde cholrangko nikkujaengachim.
