SHILLONG: Adita salrangna skang ong·atanggipa Sohiong Assembly election-o National People’s Party (NPP), hajal gittamna batpilgipa vote-rangchi United Democratic Party (UDP)-ni jako amako man·ahani gimin nipiltaianirangko dakna sienga.
Ia Sohiong election-o UDP-ni cheaniara dam 60 seat-rang donggipa Assembly-o MDA-ni bilko bilakbatatahaoba, NPP dolmade noksan ong·ani ong·skaahachim ine nikna man·a.
Ia election-o amako man·ahani gimin NPP-ni state executive committee, a·dokni Chief Minister Conrad K Sangma aro Deputy Chief Minister Prestone Tynsong choljokahaon, tom·e chanchirimanggen ine NPP-ni ku·wattimgipa Bajop Pyngrope parakataha.
“Sohiong election-ni bidingo NPP-ni SEC tom·e chanchirimanggen indiba gipin kamrangni gimin chanchiama chanchijawa ukode anga name ma·sikuja,” ine Pyngrope aganaha.
Sohiong election-ni somoio NPP aro UDP dolni gisepo matnanggrikanirang bilongahani gimin janapatengon, da·o MDA 2.0 sorkarini bilko mangrakbatataha aro da·o jako ra·e kam ka·na nangenggipade common minimum program-ko ra·gatanian ong·enga ine NPP-ni dilgipa Ampareen Lyngdoh parakatskaaha.
Election-ni somoio matnanggrikanirangko jegalatengon, MDA-o bakrimenggipa dingtang dingtang political dolrangni gisepo dingtanggrikanirang donggenchimoba, apsan bakrimna man·enganiara gisikni gita chanchina changaniko mesokani ong·enga ine Lyngdoh parakataha.
“Election-ode pilak dolrangan an·tangtangna vote-rangko salnasa jotton ka·engani gimin iandake dikdiksana matnanggrikanirangde dongaia,” ine ua talataniko on·angaha.
