SHILLONG: Garo National Liberation Army (GNLA) bobil dolko bikottaina jotton ka·enga ine koborrangko man·soahani gimin ta·raken ja·kuko de·china gita United Democratic Party (UDP), a·dok sorkarina mikrakataniko on·angaha.
“Bobil dolrangni ong·katpiltaianiara a·dokni namroro silroroaniko champengani aro manderangna kenchakna nangani ong·engani gimin bobil dolko bikotpiltaina jotton ka·enga ine agananiara kakket ong·bebea ong·ode, uamangko champengsona gita sorkari ta·raken ja·kuko de·na nanga,” ine Mongolbar salo, UDP-ni president Metbah Lyngdoh aganaha.
Baditaba bilsirangna tom·tom ong·e dongani ja·man da·o GNLA bobil dolni manderang ong·kattaina jotton ka·enga ine Police department-ni chitti kingsao parakatahachim.
Ia dongnugipa chittiko May-ni 11 tariko West Garo Hills a·jani Deputy Superintendent of Police (DSP), dingtang dingtang OC aro IC-rangna seahachim aro ia chittio police officer-ni parakani gitade, GNLA-ni gitcham membor-rang, A·chik chadamberangko bobil dolo napchina didina gita Jadi, Nongal, Challang aro Garo Hills-ni dingtang dingtang biaprango tom·anirangko ong·atengachim.
GNLA bobil dolo da·o sak 500-mangni gita chadamberangko rimnapmanaha aro ia chadamberangko skie ra·na gita Nagaland aro Burma-ona watatenga ineba social media-rangko watpripraenggipa police-rangni chittio parakahachim.
GNLA bobil dolko bikottaina gita badiaba bading chiwalgipa manderang dakchake on·enga ineba ia chittio parakahachim.
Ia chittini bidingo a·dokni DGP LR Bishnoi talataniko on·angskaengon, bobil dolo rimnapako man·gipa manderang sak 500-de ong·na man·jawa maina GNLA bobil dolni bilake kamko ka·engmiting somoioba indita manderangde dongjachim ine talataniko on·angskaaha.