SHILLONG: Sorkarini kamrangna biaprangko kanganio roster system-ko ra·gatna gita a·dok sorkari, a·dokni manderangna talataniko on·na tarimanaha ine Mongolbar salo, a·dokni Chief Minister Conrad K Sangma parakataha.
Iani bidingo kobor ra·timgipa manderang baksa agangrikengon, Roster system-ni bidingo skanggipa Budbar salo, a·dokni Cabinet-na talataniko on·angchenggen aro uni ja·man May-ni 18 tariko, MDA-o bakrimenggipa dolrangna mesoke on·angskagen ine Sangma parakataha.
“Cabinet aro MDA-o bakrimenggipa dolrangna mesoke on·ani ja·man May-ni 19 tariko pilak political dolrang baksa tom·aniko ong·ate ia roster system-ko ra·gatani bidingo mesoke on·anggen,” ine Chief Minister aganaha.
Roster system-ko ra·gatna tarigiminko ua an·tangba nimanaha ine janapatengon, ia roster system-ni bidingo sorkarini tarigiminko manderang nikmanahaode maming jajaanirang dongjawaha ine Chief Minister parakataha.
Ia Roster system-ni bidingo a·dok sorkari, Mondolini dilgiparang, songsalna kam ka·giparang, NGO-rang aro songni nokni dilgiparangnaba mesoke on·anggen ineba Chief Minister parakataha.
“Uni gimin chinga mikkang antio songsalna kam ka·enggipa dolrang baksa tom·aniko ong·atna miksongenga,” ine Sangma aganaha.
Chief Minister-ni parakatani gitade, ia roster system-ara maichim uko mande sakantina talate on·anian sorkarini miksongani ong·enga.
Bang·bata manderangan roster system-ko ma·sisrettokenga ine janapatengon, “Chingni tarigimin presentation ba mesokaniko nikmanahaon mande sakantian ia roster system-ni bidingo nambate ma·signok aro gisiko chu·ongnikaniko man·gnok,” ine Chief Minister parakataha.
Roster system-ko ra·gatkujaskal pilak department-rangon kamo ra·aniko dontongkuchina VPP-ni dabienggipani gimin sing·on, political dolrang jeko aganna ska aganaichina indiba sorkaride niamko ja·rikna nangao ga·akaia ine Chief Minister parakataha.
State Reservation Policy-ko gital dake nipiltaichina aro roster system-ko ra·gatkujaskal kamo ra·aniko dontongkuchina dabiani bidingo a·dok sorkari, maming aganchakanirangko on·kujaengani gimin VPP-ni dilgiparang da·al Budbar saloni Additional Secretariat sambao donggipa parking lot-o asonge jingjengatangna tik ka·ahachim.
