SHILLONG: Sohiong Assembly election-na campaign ka·engmiting somoirango National People’s Party (NPP) aro United Democratic Party (UDP) dolrangni gisepo matnanggrikanio Sohiong election result-ni ja·man, NPP-chi dilenggipa MDA 2.0 sorkarioniko UDP-ko ra·galani cholrang donga ine agananirangko nikna man·ahaoba iako a·dokni Chief Minister aro NPP-ni national president Conrad K Sangma da·o jegalatskaenba, MDA sorkarioniko UDP-ko ra·galjawa ine talataniko on·angaha.
Sohiong Assembly election-o UDP aro NPP dolgnini gisepo bilakbee susagrikahaoba da·o UDP chegipa ong·ahachim ine nikna man·a.
Iani bidingo kobor ra·timgipa manderang baksa agangrikengon, UDP-na on·gipa Cabinet-ni biap damgnioniko damsako ra·galenba PDF-ni MLA saksana on·skagen ine agananikoba Chief Minister raken jegalataha.
“Chingni gisepo iandake chanchianirang dongja aro ia pilakan badiaba manderangni chanchichipe agananisan ong·aia,” ine Sangma aganaha.
Sohiong election-na campaign ka·engmiting somoirango UDP aro NPP dolrangni matnanggrikgipani gimin janapatskaengon, election-ni somoirangode iandakgipa obostarang ong·aia ine Sangma talataniko on·angaha.
“Ian election-rango ong·rongbewalsan ong·aia aro election-na campaign ka·engmiting somoirangode political dolrang, vote-rangko salna jotton ka·anio basakobarangde nangana bate kattarangko aganmanaia. Indiba angni agangimin gita chinga MDA-o pangnan a·dokni namgninasa kamko ka·anggen,” ine Chief Minister parakataha.
