SHILLONG: State Reservation Policy-ko gital dake nipiltaichina aro roster system-ko ra·gatkujaskal, pilak department-rangon kamo ra·aniko dontongkuchina dabie Voice of the People’s Party (VPP), Budbar sal dipet asonge jingjengatna tik ka·angahaon, Reservation Policy-ara namen chanchininge kam ka·na nanggipasa ong·ani gimin darangba iani bidingo sorkariko drana man·jawa ine a·dokni Cabinet Minister Ampareen Lyngdoh parakatskaaha.
Reservation Policy aro roster system-ni bidingo VPP, ku·rang on·dile sorkariko jingjengatna jotton ka·engachim ine nikna man·a.
Indake ong·engon, a·dokni reservation policy aro roster system-ni bidingo MDA sorkari, MDA-o bakrimenggipa political dolrang, gipin political dolrang, NGO-rang aro chatro chatrirangni dolrang baksaba chanchirimna jotton ka·enga ine Lyngdoh talataniko on·angaha.
Reservation policy gita dakgipa kamrangara namen chanchiningna nanggipa kamsa ong·a ine janapatengon, opposition-ni membor-rang sorkarini kosako jingjengatna man·aia indiba sorkaride uamangni jingjengatanina bame on·aijawa aro iani bidingo nanga gita somoirangko ra·esa ja·kurangko de·angaigen ine Lyngdoh parakataha.
Iani bidingo ja·kuko de·na gita sorkario chanchisamsoanirang donga ineba ua talataniko on·angaha.
Iani bidingo sorkari sakoba gelna jotton ka·a ong·jaenga ine talataniko on·angengon, pilakni ku·pattianirangkon sorkari ra·gen aro ia kamo pilakkon bak ong·atgen ine a·dokni Cabinet Minister parakataha.
State Reservation Policy-ko gital dake nipiltaichina aro roster system-ko ra·gatkujaskal kamo ra·aniko dontongkuchina dabiani bidingo a·dok sorkari, maming aganchakanirangko on·kujaengani gimin VPP-ni dilgiparang da·al Budbar saloni Additional Secretariat sambao donggipa parking lot-o asonge jingjengatangna tik ka·ahachim.
