SHILLONG: Meghalaya a·doko namgipa aro bite nangninggipa alurangko science-ni bewalo ge·na gita sorkari cholrangko a·bachengataha ine Budbar salo, a·dokni Chief Minister Conrad K Sangma, Upper Shillong-ni Bio Resource Development Centre (BRDC)-o ong·atenggipa Potato Seed Production Program-ko a·dokni Agriculture Minister Ampareen Lyngdoh baksa nieani somoio parakataha.
A·doko alu ge·e man·aniko bariatna aro dingtang dingtang rokomni alurangko salgro salaramni gipin a·dokrang baksana gipin biaprangonaba palatskana gita ia project-ko a·dok sorkari a·bachengataha aro ia project-ko International Potato Centre (ICP), Meghalaya Basin Management Authority, Horticulture Department aro Shimla-o donggipa Central Potato Research Institute, jako ra·e ka·engachim.
Ia BRDC-o dingtang dingtang kolrangchi alu bitchilrangko tarina gita jakkalenggipa Apical Rooted Cutting (ARC) technique-ni bidingo official-rang agan-talate on·angaha.
Chief Minister-ni parakatani gitade, namgipa aro bite nangninggipa alurangko ge·e man·na gita science-ni bewalo gama ge·ani cholko a·bachengataha aro ia project-chi a·dok sorkari, gitcham chasong aro gital chasongni alurangni dingtanggrikaniko mesokna gita game ge·e cha·enggipa manderang baksa nangrime kamko ka·enga.
Ia project da·o dipet namen chu·sokgipa ong·enga aro mikkangchi alu ge·e cha·giparangni man·gniko bariatna gita sorkari dingtangmancha cholko a·bachengatna miksongenga ine janapatengon, a·doko alu bitchilrang chu·ongjaengani gimin alurangko chu·onga gita man·jaengoba science-ni bewalo aro ARC-ni technique-ko jakkale gama ge·aniko dakanichi ia chu·onggijaniko namatna man·gen ine Chief Minister parakataha.
Ja·mano ua, Upper Shillong-o donggipa Kyrdemkulai Integrated Village Cooperative Society (IVCS)-koba niangaha aro uano game ge·e cha·enggipa manderang baksaba agangrikangaha.
