SHILLONG: Umiam dam-o da·o chirang namen chonbatahani a·sel bijoliko bikotanio neng·nikanirangko chagrongna nangengaha aro da·o feet 1-mangni gita chi komiangkuna nanggenchimode ia hydroelectric project-ko chipna nangao ga·akgnok ine a·dokni Power Minister AT Mondal parakataha.
“Umiam dam-o da·o chini tu·ani feet 3,165-san ong·aiaha aro ian Umiam dam-ko kulichengaoni komibatsranggipa ong·enga. Chi tu·ani da·o feet-samangni gita komiangkuode chinga ia plant-o chipna nangaignok,” ine Mondal aganaha.
Dongimin niamna bate chirang tang·onangahaode hydel project-ko chalaina gita man·jaha ineba ua talataniko on·angaha.
Indake ong·genchimoba, mikkarang da·o wana a·bachengengahani gimin mikkarang wajringahaode obostarang namkalbagnok ine Power Minister, an·tangni ka·dongchakenganiko parakataha.
Mikkarang nanga gita wakujaskalde a·doko bijoliko kimitangkuna nangaigen ine janapatskaengon, da·o dakenga gitan Tura aro Shillong-o konta 8-na aro a·dokni gipin biaprangode salo konta 10-na bijoliko kimitangkugen ine Mondal parakataha.