SHILLONG: Assam aro Meghalaya a·dokni simarango meligrikna man·jaenggipa bangki damdok biaprangni bidingo dolgni agangrikaniko re·baenggipa May-ni 24 tariko Guwahati songjinmao a·bachengattainaba gnang.
Ia tom·anio a·dok damgnini chief minister-rang aro a·dok damgnini regional committee membor-rang bakko ra·anggen ine ka·dongsoenga.
“Assam-ni chief minister aro anga, committee membor-rang baksa ia jani 24 tariko tom·na miksongenga aro ia tom·aniko Guwahati songjinmao ong·atnaba gnang,” ine a·dokni Chief Minister Conrad K Sangma aganaha.
Chief Minister-ni parakatani gitade, dolgnian ia tom·aniko ong·atna manchigrikaha aro da·o name tik ka·grikna gita sengengkua.
“Ia tom·aniko ong·atna pilak nanga kamrangko tik ka·manaha aro manchisogimin gita ong·aiaha ong·ode chinga ia jani 24 tariko tom·gen,” ine Sangma aganaha.
Guwahati songjinmao tom·e chanchirimani ja·man, a·dok damgnini chief minister-rangan, so·sojengjeng ong·enggipa Block-I aro Block-II jolrangona re·ange tom·tomaniko rakkichina didianggen ineba Sangma parakataha.
Adita salrangna skang, West Jaintia Hills a·jani Khanduli songo so·sojengjeng ong·anggipani gimin janapatengon, “Iandakgipa obostarangni giminsa dolgnini gisepo agangrikaniko nangchongmota aro ta·raken cholko sandina nangenga,” ine a·dokni Chief Minister parakataha.
Ia jolrango dolgnichipakkon tom·tome dongchina gitaba ua didiataha.
Assam aro Meghalaya a·dokni simao meligrikna man·jaenggipa bangki damdok biaprangara, Langpih, Borduar, Nongwah-Mawtamur, Deshdoomreah, Block- I, Block-II aro Psiar-Khanduli jolrang ong·engachim.