Baghmara-o skul bi·sarangni namgnina ramako somoi gita watchina didia

TURA: South Garo Hills a·jani Baghmara-o donggipa Pioneers’ Secondary School mikkango aro Rangku Memorial Girls’ Secondary School-ni janggilo donggipa rama namen apchonbeoba ia rama gita gari gorarang bang·en re·ruraengani a·sel skulo poraienggipa bi·sarangna kenchakna nangani ong·enga ine Pioneers Secondary School-ni headmaster parakatenba, ia rama gita skul a·bachengani aro skul jokani somoio gari gorarangko re·rurana on·jachina Baghmara police station-ni officer-in-charge (Traffic)-na sedoataha.
Baghmara Police Station-ni officer-in-charge-na sedoatgipa chittio, skul headmaster-ni parakatani gitade, Baghmara-o donggipa Pioneers’ Secondary School mikkango aro Rangku Memorial Girls’ Secondary School-ni janggilo donggipa rama gita skulni somoirango aro mongsongbate bi·sarangni skul re·baengmitingo aro skul jokmiting somoio gari gorarang re·ruraengani a·sel, ia biapo bang·en a·sel ong·anirangko nikna man·aha aro ian bi·sarangna namen kenchakna nangani ong·enga.
Uandaken, skulo poraienggipa bi·sarangni namgnina, pringo skul kuliani somoio pring 8:30 bajioni 9:30 bajiona aro attamo 2:30 bajioni 3:30 bajiona ia rama gita gari gorarangni re·ruraaniko champengatchina Pioneers Secondary School-ni headmaster, Baghmara Police Station-ni officer-in-charge-ko mol·molataha.