TURA: Bristibar salo, Tura-ni kilometre 18-mang chel·ao donggipa Asanang-o, Bolero gari bolsa, autorickshaw-ko su·gake a·sel ong·anio mande saksa siangna gita nangaha aro sakgni saknaanirangko man·na nangaha.
Gari a·sel ong·anio sianggipa mandeara Asanang samba jolo donggipa Matchurigre songni Genda Ch Marak minggipa mande ong·achim ine kobor on·timgiparang u·iataha.
Mikrontangchi nikgipa manderangni u·iatani gitade, Bolero gari ‘wrong side’ ba ramani ong·gijagipa bakchipakni re·baenba autorickshaw-ko su·gakeaha aro su·gakako man·e ia auto-ni driver, jean auto-ni nokgipaba ong·achim, a·sel ong·gipa biapon sikamaha.
Ia autorickshaw-o gadoenggipa gipin manderangba bilongbee saknaanirangko man·na nangtokaha.
