SHILLONG: Robol kal·aniko namdapatna gita Dream Foundation baksana Assam Rifles Public School, BBFS Residential Academy, Indian Football Foundation aro Baichung Bhutia Football School-ni kuligipa Dare to Dream Academy-ko Bristibar salo, a·dokni Chief Minister Conrad K Sangma, NEHU-ni SAI-ko oprake on·angaha.
Salgro salaram jolo skanggipa residential football academy-na Meghalaya a·doko Shillong songjinmako seokahani gimin Dream Foundation aro Baichung Bhutia-ko mittelpilangengon, ian a·dokna mikkim rasongko ra·baan baksana a·dokni aro salgro salaram jolni chadamberango kal·susana changa sapanirangko mesokaniba ong·enga ine Chief Minister parakataha.
Chief Minister-ni aganani gitade, batanggimin bilsirango, STAR Talent Identification program-chi Meghalaya sorkari, Meghalaya a·dok gimikni sak 5000-mangni gita kal·susaanio changgipa sapgipa bi·sarangko porikka ra·e nimanaha aro seoka man·gipa chadamberangna dingtang dingtang training program-rangko ong·ate skie on·enga.
“Chinga bebera·a, 2036 bilsini Olympics-ode Meghalaya a·dokni kal·susagipa chadamberangoniba a·songna medal-rangko chee on·gnok aro iani giminsa kal·susaanio changgipa sapgipa chadamberangko sandie international gadango training-ko on·na gita STAR Talent Identification Program-ko sorkari a·bachengataha,” ine Chief Minister aganaha.
Chadamberangni nangnikani aro jumangrangko politician-rang, bureaucrat-rang aro songsalni manderangba basakobade ma·sisokja ine janapatengon, iani giminsa sorkari, chadamberangna kal·susaani, doka dam·ani aro uandakgipa kamrangna dingtangmancha policy aro program-rangko tarie on·enga ine Sangma parakataha.
Chadamberango aiao inmangipa bilrang aro aro ia bilko an·ching nama ramao mesoke on·na nangani giminsa chadamberangna dingtang dingtang program-rangko sorkari ra·gatenga ineba Chief Minister parakataha.
Ia academy-ko kulianichi jolni chadamberangna robol kal·aniko namdapatna cholrangko on·gen ine janapatengon, mikkangchiba ia Dream Foundation, dingtang dingtang a·bani centre of excellence-rangko kulina miksongenga ine Chief Minister, an·tangni kusi ong·aniko parakataha.
