Tosekgre songo Plantation Mission-ko Assembly Speaker a·bachengate on·anga

TURA: Bristibar salo, Meghalaya Legislative Assembly-ni Speaker Thomas A Sangma, Rongram C&RD Block-ni ning·o donggipa Tosekgre Government LP School-o District Plantation Mission-ko a·bachengate on·angaha. Ia apsan salon, Tosekgre Govt LP School-ni gital nokkoba Assembly Speaker aro North Tura-ni MLA, nokdonggae on·angjolaha.
Ia tom·anio Assembly-ni Speaker, tom·anio bak ra·enggipa manderangna aganprakangengon, Plantation Mission-ni gimin talataniko on·angenba, samtangtango ong·telaigiparangko chel·chakna aro chiring chibisikrangko tangatpilna gita jinma bol ge·anirangko dakjringna nanga ine didianiko on·angaha.
Tosekgre Govt LP skulni gital nokko oprake on·ani gimin janapatskaengon, Infrastructure Upgradation project-ni skanggipa bako West Garo Hills a·jani dam 64 skulrangko jako ra·gen aro ianoni dam 14 skulrangde North Tura constituency-ni ning·o donggipa skulrangan ong·a ine Sangma parakataha.
A·doko bang·bata sorkari skulrangan obosta namsrangjaengahani gimin sorkari ia infrastructure project-ko ra·gataha ineba Assembly Speaker parakataha.
Ia tom·anio West Garo Hills a·jani Deputy Commissioner Jagdish Chelani-ba jinmana aganprakangengon, batanggimin sal somoirango mikkarang wajae manderang ding·aniko chakna nangaha aro chiring chibisikrangba tipangtokaha ine janapatenba, samtangtango ong·telaigiparang, bol wa·arangko aro chiring chibisikrangko ripinge rakkina nangchongmotani gimin aganangaha.
Wa·arangko ge·aniara chirangko ripinge rakkina dakchakanisan ong·aigija a·arangni ruronganiko chel·chakna gitaba rakkia ineba Deputy Commissioner parakataha.
Ja·mano, Assembly-ni Speaker aro program-o bak ra·gipa dingtang dingtang official-rang, Tosekgre chiring sambao wa·a chararangko ge·angaha.
Tosekgre Govt LP School-ni gital nokko Infrastructure Upgradation Phase I-ni ning·o gong 37,02,028 korosrangchi rikahachim ine nikna man·a.
Ia program-ko ong·atanio dongpae jinmana aganprakanggipa gipin manderangara, Tura Municipal Board-ni Chairman JD Sangma, DRDA-ni Project Director DBG Momin, Rongram-ni BDO Tadingchi Sangma, SDSEO Samuel Marak, MGNREGA-ni DPM Sarlia Marak aro gipinrang ong·a.