SHILLONG: Meghalaya a·doko roster system-ko ra·gatanina MDA 2.0 sorkariko mittelpilatenba, ia roster system-ko ra·gataniara, a·doko songdongenggipa pilak jatrangnan bak rengsiko tikatani gita ong·gnok ine Sukrobar salo National People’s Party (NPP) parakataha.
Iani bidingo kobor ra·timgipa manderang baksa agangrikengon, Roster system-ko ra·gatanio batanggimin somoirango nangchakeani dongjawa aro a·doko skanggipa changna pilak department-rangan da·o mikkang salrango nangchakena gitasa ia roster system-ko ja·rikanggnok ine a·dokni Cabinet Minister aro NPP-ni dilgipa Ampareen Lyngdoh parakataha.
“Reservation policy-ni roster-ko ja·rikna gita bang·bata department-rangon data ba chimonge rakkianirang dongjani gimin pilak department-rangan da·o ia roster system-ko mikkangchinasa ja·rikanggnok,” ine Lyngdoh aganaha.
Political dolrangni tom·aoni VPP-ni ong·kate katgipani bidingo janapatengon, 1972 bilsini reservation policy-ko Article 16 Clause four-ni ning·osa tariaha aro ian songsalo bilgrigipa manderangna cholko on·na gitasa donaha inen iano tale seaha ine NPP-ni state president WR Kharlukhi parakatskaaha.
“Constitution-ni badia bako, mande jelbra jelsuanio pangchakesa reservation policy-ko tarina nanga ine sea donga? Na·simang iako ma·sibata ong·ode angna talate on·china. India a·songo Tribal-rangni jelbra jelsuani 8.6 percent-san ong·aia indiba an·chingna biaprangko donkuenga. An·chingkoara songsalo bilgribatgiparang ine chanani giminsa aro Tribal-rangko ra·dona miksonganiosa ia cholrangko man·enga,” ine Kharlukhi talataniko on·angaha.
Iani bidingo politics kal·jachina aro a·doko songdongenggipa jatrangni gisepo ma·ekgrikataniko ra·bajachina gitaba ua, VPP-ni dilgiparangko didiataha.