Resubelpara: North Garo Hills Resubelpara, Mendipathar Multi Coperative Society Hall-o World Bee Day-ko mijalo maniangaha aro uno bija jilgiparang, game-sue cha·giparang aro bija jilna namen skia man·giparang bang·en programme-o dongpaaha.
Programme-ko District Horticulture Office, Resubelpara, “Bee Engaged-in Pollinator friendly agricultural production” ja·pang kata done ong·ataha aro samtangtangna bijarang aro uamangni kam ka·gipa ong·e bijani awareness-ko ong·atani gimin aganaha.
NGH-ni Additional Deputy Commissioner JRT Sangma chief guest ong·e tom·ao aganao hosticultural, DCIC, MBDA unagreba bang·a sorkarini department-ni scheme-rangchi technical aro tangka-paisani gita dakchakaniko ame uamangni bija jilani kamko bilakbatchina bija jilgiparangko didiaha.
A·jolo aro a·doko man·gipa bija bitchiko kati, cha·anina aro samna-bolna a·dokni a·palrangchi bang·en amgiparang donga, ua aganaha.
Programme-ni ja·pang-katani gimin aganao, cha·ani aro chiring-chi·bisikko ripinganio bijarangni kamrangna uarangko chel·chakna gita Sangma aganaha.
Tom·ako do·ga oao NGH, District Horticulture Officer Canning S Shabong, programme-ni miksongani bijarangni mongsonggipa ong·ani gimin manderangna u·iataniko dakna aro janggi tangani cholko nakatani gimin miksonge ong·atani gimin ine aganaha.
Bija jilachi bolam-biterangko man·ani gita uarangko ge·aniko a·palbatatna sorkarini ja·ku de·aniko Salma Momin, Asst. Director of Horticulture, Apiculture Mission 2.0-ni ning·o district-ni dam bonga biaprangko parake komibeoba sak 50 bija jilgipa sakprak bija jilani bakos, gipin nangarangko on·anggen ine aganaha.
A·dokni NGH, Sambrak Seed Farm-o ge·sasangipa Integrated Bee Development Centre (IBDC), gisik a·ning bite bija bitchi tariani, gamchatani, botolo braani aro damko tapani aro palani changsao Ma·mong kam chu·sokaniko man·e manderangna kam ka·ani ong·gen, Momin aganaha.
Programme-ni bak dingtang dingtang Self Helf Group-rang aro badingchiwalgiparangchi bang·a joltango bija bitchiko man·anirang nambatatengaha urangko mesokangaha. Bija jilna skia man·giparang baksa agangrikani session-ko dakaha.
